1400 కోట్లు ఈ టాలీవుడ్ సినిమా బ‌డ్జెట్

1400 కోట్లు.. అక్ష‌రాలా ప‌ద్నాలుగు వంద‌ల కోట్లు. ఈ సంఖ్య విన‌డానికి ఎంత సింపుల్ గా ఉందో అంత‌కంటే ఎక్కువ బ‌రువు తూగుతోంది. ఇంత పెద్ద మొత్తం వెచ్చించి సినిమా తీయ‌డానికి ఇదేమైనా హాలీవుడ్డా?  జస్ట్ టాలీవుడ్...! ఇంత చిన్న ప‌రిశ్ర‌మ‌లో అంత పెద్ద బ‌డ్జెట్ పెట్టి ఏ సినిమా తీస్తున్నారు? అంటే... దీనికి స‌మాధానం ఆశ్చ‌ర్య‌ప‌రుస్తోంది. అంతేకాదు.. హాలీవుడ్ లో పీసీ న‌టించిన సిరీస్ `సిటాడెల్` కోసం ఏకంగా రూ.2800 కోట్లు ఖ‌ర్చు చేస్తే, ఇప్పుడు ఒక తెలుగు హీరో న‌టించిన సినిమా కోసం సుమారు అందులో సగం బ‌డ్జెట్ ని కేటాయించారు. నిజంగా ఇది సాహ‌సంతో కూడుకున్న‌ది.

నిజానికి బాహుబ‌లి తో సాహ‌స‌యాత్ర మొద‌లు పెట్టాడు రాజ‌మౌళి. ఆ సినిమాకి 250 కోట్ల బ‌డ్జెట్ ఖ‌ర్చు చేసారు అన‌గానే అంద‌రికీ క‌ళ్లు భైర్లు క‌మ్మాయి. బాహుబ‌లి రెండు భాగాల‌కు క‌లుపుకుని దాదాపు 500 కోట్లు పైగా పెట్టార‌ని తెలిసి అంద‌రూ ఆశ్చ‌ర్య‌పోయారు. అయితే ఆ రెండు భాగాలు క‌లుపుకుని ఏకంగా 2200 కోట్లు వ‌సూలు చేయ‌డం సంచ‌ల‌నం. 

ఆ త‌ర్వాత ఆర్.ఆర్.ఆర్ కోసం 500 కోట్లు ఖ‌ర్చు కేసిన రాజ‌మౌళి మ‌రో 1000 కోట్ల క్ల‌బ్ ని త‌న ఖాతాలో వేసుకున్నాడు. ఇప్పుడు ఏకంగా `వార‌ణాసి` కోసం 1400 కోట్లు ఖ‌ర్చు చేస్తుండ‌డం స‌ర్వ‌త్రా ఉత్కంఠ క‌లిగిస్తోంది. ఒక అంచ‌నా ప్ర‌కారం మ‌హేష్ - రాజ‌మౌళి జోడీ వార‌ణాసి చిత్రాన్ని ఒక డీసీ- యూనివ‌ర్శ‌ల్ ఫ్రాంఛైజీ సినిమాలాగా అత్యంత భారీగా రిలీజ్ చేస్తార‌ని భావిస్తున్నారు. అంత‌ర్జాతీయ మార్కెట్ల నుంచి సులువుగా డ‌బ్బు ఆర్జించే మార్గాన్ని జ‌క్క‌న్న అన్వేషిస్తున్నాడ‌ని కూడా అర్థం చేసుకోవ‌చ్చు.