నంద‌మూరి - అక్కినేని కాంబినేష‌న్ అంటే య‌మా క్రేజు. ఎన్టీఆర్, ఏఎన్నార్ క‌లిసి ప‌లు చిత్రాల్లో న‌టించి అభిమానుల్ని అల‌రించారు. ఆ త‌ర్వాత మ‌ళ్లీ ఆ కాంబినేష‌న్ సెట్ట‌య్యింది లేదు. నాగార్జున - హ‌రికృష్ణ క‌లిసి 'సీతారామ‌రాజు' చేశారంతే. మూడో త‌రం క‌థానాయ‌కులైనా క‌లిసి న‌టిస్తారేమో అని ఎదురు చూస్తున్నారు ప్రేక్ష‌కులు. ఆ ముచ్చ‌ట ఎప్పుడు తీరుతుందో ఏంటో. అయితే ఆమ‌ధ్య ఎన్టీఆర్, నాగార్జున క‌లిసి ఓ చిత్రంలో న‌టిస్తార‌ని ప్ర‌చారం సాగింది. కానీ అది జ‌ర‌గ‌లేదు. వెండితెర‌పై ఆ కాంబినేష‌న్‌ని చూస్తామో లేదో తెలియ‌దు కానీ... బుల్లితెర‌పై మాత్రం నాగ్, ఎన్టీఆర్ క‌లిసి త్వ‌ర‌లో వినోదాలు పంచ‌బోతున్నారు. 'మీలో ఎవ‌రు కోటీశ్వ‌రుడు' కార్య‌క్ర‌మం ద్వారా. ప్ర‌స్తుతం నాగార్జున మూడో ద‌ఫా 'మీలో ఎవ‌రు కోటీశ్వ‌రుడు' కార్య‌క్ర‌మాన్ని నిర్వ‌హిస్తున్న సంగ‌తి తెలిసిందే. అందులో భాగంగా బుధ‌వారం ఎన్టీఆర్‌ని హాట్ సీటెక్కించాడు నాగార్జున. అన్న‌పూర్ణ స్టూడియోలో ఆ ఎపిసోడ్‌ని షూట్ చేశారు. త్వ‌ర‌లోనే ఎన్టీఆర్ న‌టించిన 'నాన్న‌కు ప్రేమ‌తో' చిత్రం విడుద‌ల కాబోతోంది. నాగ్ న‌టించిన 'సోగ్గాడే చిన్ని నాయ‌నా' కూడా ప్రేక్ష‌కుల ముందుకు రాబోతోంది. ఈ ద‌శ‌లో ఇద్ద‌రూ క‌లిసి షో చేయ‌డం విశేషం. రెండు సినిమాల‌కీ ప్ర‌మోష‌న్ జ‌రిగినట్ట‌వుతుందీ, దాంతోపాటు ప్రేక్ష‌కుల‌కూ బోలెడ‌న్ని వినోదాలన్న‌మాట.
Loading..