110 ఏళ్ల సినీ చరిత్రలో రాని తొలి చిత్రమిది!
Habeebi Movie Synopsisప్రస్తుత సమాజంలో వాణిజ్య హంగులు, యాక్షన్ ఎలిమెంట్లతో నిండిన చిత్రాలు వెల్లువలా వస్తున్నా? సహజత్వానికి దగ్గరగా ఉంటూ మనసును హత్తుకునే కళాఖండాలు చాలా అరుదుగా వస్తుంటాయి. ఈ క్రమంలోనే విలక్షణమైన కథాంశంతో ప్రేక్షకుల ముందుకు వస్తున్న నూతన చిత్రమే `హబీబి`. మూడు తరాలుగా చేనేత వృత్తినే నమ్ముకుని, అత్యంత సాధారణ జీవనాన్ని గడుపుతున్న ఒక మధ్యతరగతి ఇస్లామిక్ కుటుంబం నేపథ్యంతో ఈ సినిమా రూపొందించారు. కష్టపడి డబ్బు సంపాదించి కుటుంబాన్ని సంతోషంగా చూసుకోవాలనే ఆకాంక్షతో కొత్తగా పెళ్లయిన భార్యను సైతం వదిలి ఓ యువకుడు దుబాయ్ దేశానికి పయనమవ్వడం - అక్కడ అతను ఎదుర్కొన్న జీవిత సత్యాల చుట్టూ ఈ కథాంశం ఎంతో ఆసక్తికరంగా తిరుగుతుంది.
దర్శకుడు కతిరవన్ తెరకెక్కించిన చిత్రంలో కథానాయకుడు మహమ్మద్ యూసుఫ్ అనే ముస్లిం యువకుడికి ఒక అగ్రహారంలోని అయ్యంగార్ కుటుంబం ఆశ్రయం కల్పించడం కథలో ఒక కీలకమైన మైలురాయిగా మారుతుంది. ప్రేమ, మానవత్వం అనేవి కేవలం కుల, మత, జాతి వంటి కృత్రిమ సరిహద్దులకు లోబడి ఉండవని, అవి వీటన్నింటికీ అతీతమైనవని ఈ చిత్రం చాటిచేబుతోంది. ఈ వైవిధ్యభరితమైన మరియు ఆత్మీయమైన చిత్ర నిర్మాణంలో సీనియర్ దర్శకులు, నటులు అయిన కస్తూరి రాజా కీలక పాత్ర పోషించడమే కాకుండా, చిత్ర నిర్మాణంలో సాంకేతిక నిపుణులను ప్రోత్సహించడంలో అందించిన అపారమైన సహకారం ఈ చిత్రానికి అదనపు బలాన్ని చేకూర్చింది.
సమకాలీన చలనచిత్ర రంగంలో కేవలం వాణిజ్య ప్రయోజనాలే ధ్యేయంగా కాకుండా సమాజంలోని అట్టడుగు వర్గాల జీవన పోరాటాలను, మానవ సంబంధాలలోని సున్నితత్వాన్ని ప్రతిబింబించే ఇలాంటి చిత్రాల ఆవశ్యకత ఎంతైనా ఉంది. `హబీబి` వంటి సినిమాలు కుటుంబ కథగా మిగిలిపోకుండా మనుషుల మధ్య ఉండాల్సిన నిస్వార్థమైన అనురాగాన్ని , పరమత సహనాన్ని గుర్తుచేస్తాయి. వైవిధ్యభరితమైన పాత్రలతో, సహజసిద్ధమైన సంభాషణలతో హృదయాలను కదిలించే ఈ చిత్రం భవిష్యత్తులో మరిన్ని సందేశాత్మక చిత్రాల రాకకు మార్గదర్శకంగా నిలుస్తుందని విశ్లేషకులు భావిస్తున్నారు. 110 ఏళ్ల సినీ చరిత్రలో ఇలాంటి చిత్రం రాలేదని మేకర్స్ చెబుతున్నారు.
