బన్నీ ఎందుకిలా.. డైలామాలో ఫ్యాన్స్!

టాలీవుడ్ స్టైలిష్‌ స్టార్‌ అల్లు అర్జున్‌- త్రివిక్రమ్‌ శ్రీనివాస్ దర్శకత్వంలో తెరకెక్కుతున్న ‘అల వైకుంఠపురంలో’ సినిమా షూటింగ్‌ నడుస్తున్న సంగతి తెలిసిందే. అయితే ఈ సినిమా తర్వాత బన్నీ బిజీబిజీ అవుతాడని రెండు సినిమాలు లైన్‌లో ఉన్నాయని అందులో ఒకటి వేణు శ్రీరామ్‌ దర్శకత్వంలో ఐకాన్‌ కాగా.. మరొకటి క్రియేటివ్‌ డైరెక్టర్ సుకుమార్‌తో. ఇప్పటికే ఈ రెండు సినిమాలపై అధికారికంగా ప్రకటన కూడా వచ్చేసింది.

అయితే తాజాగా అందుతున్న విశ్వసనీయ వర్గాల సమాచారం మేరకు ఈ రెండు సినిమాలను బన్నీ పెండింగ్‌లో పెట్టేసినట్లు తెలుస్తోంది. ఇందుకు కారణం.. వేణు శ్రీరామ్‌, సుకుమార్‌ చెప్పిన కథలు విన్న బన్నీ తనదైన శైలిలో మార్పులు, చేర్పులు చేయాలని సూచించాడట. అంతేకాదు.. ఫలానా విధంగా కథ మార్చండని సలహా కూడా ఇచ్చాడట. దీంతో ఈ ఇద్దరు దర్శకులు మార్పులు చేయాలంటే కనీసం కొన్ని నెలలు సమయం కచ్చితంగా పడుతుంది. 

ఈ క్రమంలో ఈ ఇద్దరూ కాకుండా మరో దర్శకుడితో సినిమా చేసేస్తే పోలా.. అని అల్లువారబ్బాయి ప్రయత్నాలు చేస్తున్నట్లు సమాచారం. ఒక వేళ ఆ లోపు ఈ రెండు కథల్లో ఏదైనా వర్కవుట్ అయితే సరే లేకుంటే కొత్త డైరెక్టర్‌కు గ్రీన్ సిగ్నల్ ఇవ్వాలని బన్నీ బావిస్తున్నాడట. ఇలా రోజుకో వార్త పుట్టుకొస్తుండటంతో అసలు నిజానిజాలేంటో తెలియక మెగాభిమానులు, బన్నీ వీరాభిమానులు డైలామాలో పడ్డారట. మరి ఈ వార్తలపై క్లారిటీ రావాలంటే బన్నీ లేదా ఇద్దరు దర్శకులు కనీసం సోషల్ మీడియా ద్వారా అయినా స్పందించాల్సిన అవసరం ఎంతైనా ఉంది.