నా చెల్లెలు రాదంటున్న హీరో!

బాలీవుడ్‌ నటుడు అర్జున్‌ కపూర్‌ తన చెల్లెలికి సినిమాల్లోకి రావడం ఇష్టంలేదని అంటున్నాడు. చూడడానికి చాలా ముద్దుగా, బొద్దుగా వుండే అర్జున్‌ కపూర్‌ చెల్లెలు అన్షులని చూసిన వారంతా..ఈ అమ్మాయి గ్యారంటీగా సినిమాల్లోకి వస్తుందని అనుకుంటారు. కానీ తన చెల్లెలికి ఈ ఫీల్డ్ అస్సలు ఇష్టం లేదని అర్జున్ కపూర్ తేల్చేశాడు. 

తన చిత్రం ‘ముబారకన్‌’ బాక్సాఫీస్‌ వద్ద కమర్షియల్‌ గా హిట్‌ ని అందుకోవడంతో ఎంతో ఆనందంతో వున్న అర్జున్‌ కపూర్‌ మీడియా కి ఇచ్చిన ఇంటర్వ్యూలో.. సోదరి అన్షుల గురించి ఈ విధంగా తెలిపాడు.

‘నా సోదరి అన్షులకి సినిమాల్లోకి రావడం ఇష్టంలేదు. సినిమాలు మాత్రం బాగా చూస్తుంది. ముఖ్యంగా నా సినిమా విడుదల అయితే చాలు ఓ సాధారణ అమ్మాయి లాగే ఆన్‌లైన్‌లో టికెట్స్‌ బుక్‌ చేసుకుని స్నేహితులతో కలిసి చూస్తుంది. నా సినిమాలకు అన్షుల ఓ ప్రేక్షకురాలుగా రిజల్ట్ చెబుతుంది. నేను నటించిన సినిమాలు విడుదలయ్యాక మొదట తన అభిప్రాయమే అడుగుతా. అన్షుల చెప్పే రిజల్ట్ ని బట్టి ప్రేక్షకులు నా నుండి ఎలాంటి సినిమాలు కావాలనుకుంటున్నారో నాకు తెలుస్తుంది...' అంటూ తన సోదరి గురించి చెప్పుకొచ్చాడు అర్జున్‌.