రాజ్ తరుణ్ పై ఈ నిర్మాతకి ఎంత నమ్మకమో?

అదృష్టవంతుడంటే యంగ్‌హీరో రాజ్‌తరుణ్‌ను ఉదాహరణగా చెప్పాలి. హీరో అవుతానని కూడా ఊహించని ఈయన నాగార్జునను కూడా మెప్పించి హీరోగా మారి తొలి మూడు చిత్రాలతో హ్యాట్రిక్‌ కొట్టాడు. 'ఉయ్యాల...జంపాల, సినిమా చూపిస్త మావా, కుమారి 21ఎఫ్‌' చిత్రాలతో హ్యాట్రిక్‌ కొట్టిన ఈ హీరో ఆ తర్వాత మంచు విష్ణుతో కలిసి నటించిన 'ఈడో రకం.. ఆడో రకం'; 'సీతమ్మ అందాలు.. రామయ్య సిత్రాలు' చిత్రాలు మాత్రం పెద్దగా ఆకట్టుకోలేదు. అయినా కానీ ఈ యంగ్‌ హీరో దూకుడు తగ్గలేదు. వరుసగా ఒకే నిర్మాణసంస్థలో రెండు చిత్రాలు చేస్తున్నాడు. ఇలా ఓ అప్‌కమింగ్‌ హీరోను నమ్మి ఒక చిత్రం నిర్మాణంలో ఉండగానే రెండో చిత్రంలో కూడా ఒకే నిర్మాత అవకాశం ఇవ్వడం చాలా అరుదు. ఆ నిర్మాత దగ్గర ఆ హీరో ఎంతో నమ్మకం సంపాదించుకుంటే కానీ ఇది సాధ్యం కాదు. దాన్ని రాజ్‌తరుణ్‌ నిజం చేశాడు. ప్రస్తుతం ఆయన 'కిట్టు ఉన్నాడు జాగ్రత్త'చిత్రంతో పాటు 'అంధగాడు' అనే చిత్రాన్ని చేస్తున్నాడు. ఈ రెండు చిత్రాలను నిర్మాత అనిల్‌సుంకర నిర్మిస్తున్నాడు. ఈ రెండు చిత్రాల షూటింగ్‌ ఎలాంటి హడావుడి లేకుండా వేగంగా సాగుతోంది. ఇటీవల విడుదలైన 'కిట్టు ఉన్నాడు జాగ్రత్త' పోస్టర్‌కు మంచి స్పందన లభించింది. కాగా ఈ చిత్రానికి వంశీకృష్ణ దర్శకత్వం వహిస్తున్నాడు. ఇక 'అంధగాడు' చిత్రానికి రచయిత వెలిగొండ శ్రీనివాస్‌ దర్శకత్వం వహిస్తున్నాడు. మరి వెలిగొండ శ్రీనివాస్‌ కథపై, దర్శకత్వ ప్రతిభపై ఎంతో నమ్మకం ఉంటే గానీ ఇది సాద్యం కాదు. మరి ఈ రెండు చిత్రాలు రాజ్‌తరుణ్‌కు ఎలాంటి ఫలితాలను అందిస్తాయో వేచిచూడాలి.