రజనీకాంత్ కంటే సుదీప్ గొప్ప నటుడా..!
సీనియర్ దర్శకుడు రామ్గోపాల్ వర్మ నిత్యం తనకు తోచిన అంశాన్ని ట్విట్టర్ ద్వారా అభిమానులతో పంచుకుంటుంటాడు. అలా నిత్య చైతన్యంతో జీవిస్తుంటాడు. కానీ ప్రేక్షకులను మాత్రం కొన్ని కొన్ని సార్లు పిచ్చెక్కిస్తుంటాడు. ఆ రకంగా వివాదమైన ట్వీట్లే ఆయన జాబితాలో ఎక్కువగా ఉంటాయి. తాజాగా ఇప్పుడు కన్నడ స్టార్ యాక్టర్ సుదీప్ నటనను అమితంగా మెచ్చుకున్నాడు వర్మ. అయితే ఆ మెచ్చుకొనే క్రమంలో రజనీకాంత్, కన్నడ నటుడు విష్ణువర్ధన్ కంటే సుదీప్ మంచి నటుడు అనేశాడు. అదీ... ఆ రకంగా ఇప్పుడు ఆ ట్వీట్స్ దుమారం రేపుతున్నాయి. దివంగత కన్నడ నటుడు విష్ణువర్ధన్తో పాటు సూపర్స్టార్ రజనీకాంత్పై వర్మ చేసిన వ్యాఖ్యలు కన్నడిగుల ఆగ్రహానికి కారణమయ్యాయి. కాగా ఈ మధ్యనే విడుదలైన ‘కిచ్చా’ సుదీప్ సినిమా, ‘కోటిగొబ్బ-2’ని చూసిన వర్మ ట్విటర్ ద్వారా ‘రజనీకాంత్ కేవలం స్టైల్తో నెగ్గుకొస్తున్నాడు. అసలు రజినీ జీవితంలో ఎంత కష్టపడినా 'ఈగ' వంటి సినిమాలో సుదీప్ పాత్రను పోషించలేడు. ‘కోటిగొబ్బ-2’లో సుదీప్ నటనతో పోల్చితే ‘కోటిగొబ్బ-1’లో విష్ణువర్ధన్ సరిగా చేయలేదు’ అనేశాడు.
అయితే వర్మ ట్వీట్స్ కు స్పందించిన సుదీప్.. విష్ణువర్ధన్, రజనీకాంత్ వంటి నటదిగ్గజాలతో నన్ను పోల్చడం వర్మకు అంత మంచి విషయం కాదని వెల్లడించాడు.
