బరువు తగ్గుతోన్న సీనియర్ హీరో! బరువు తగ్గుతోన్న సీనియర్ హీరో!

త్వరలో నాగార్జున హీరోగా కె.రాఘవేంద్రరావు దర్శకత్వంలో మహేష్‌రెడ్డి నిర్మాతగా 'ఓం నమో వేంకటేశాయ' చిత్రం పట్టాలెక్కనున్న సంగతి తెలిసిందే. శ్రీ వేంకటేశ్వరస్వామికి వీరభక్తుడైన హతీరాం బాబా జీవిత చరిత్ర ఆధారంగా ఈ చిత్రం రూపొందనుంది. 'ఊపిరి' చిత్రం కోసం కాస్త బరువు పెరిగిన నాగార్జున హతీరాం బాబా పాత్ర కోసం బరువు తగ్గే పనిలో ఉన్నాడు. అయితే ఈ చిత్రంలో అనుష్క, ప్రగ్యా జైస్వాల్‌లు కీలకపాత్రలు పోషిస్తున్న సంగతి తెలిసిందే. కె.రాఘవేంద్రరావు - నాగార్జునల కాంబినేషన్‌లో వచ్చిన 'అన్నమయ్య, శ్రీరామదాసు' చిత్రాలలో వేంకటేశ్వరస్వామిగా, రాముడిగా అలరించిన సుమన్‌ ఈ చిత్రంలో కూడా వేంకటేశ్వరస్వామి పాత్రను పోషిస్తారని అందరూ భావించారు. కానీ దర్శకనిర్మాతలు ఈ చిత్రం కోసం కొత్త వేంకటేశ్వరస్వామిని సెలక్ట్‌ చేసుకున్నట్లు సమాచారం. హిందీ సీరియల్స్‌లో శ్రీకృష్ణుడిగా నటించి మంచి పేరు తెచ్చుకున్న సురభ్‌రాజ్‌జైన్‌ ఈ చిత్రంలో వేంకటేశ్వరస్వామి పాత్రలో నటిస్తున్నాడు. 'గాయం2, రంగా ది దొంగ' చిత్రాల్లో నటించిన విమలారామన్‌ ఈ చిత్రంలో వేంకటేశ్వరస్వామి భార్యల్లో ఒకరైన శ్రీదేవి పాత్రలో నటించనుందని సమాచారం.