ప్రత్యేక శిక్షణ తీసుకుంటున్న బాలయ్య!

తన 100వ చిత్రంగా నందమూరి బాలకృష్ణ క్రిష్‌ దర్శకత్వంలో చారిత్రక కథాంశంతో ఓ చిత్రాన్ని చేయనున్న సంగతి తెలిసిందే. కాగా ఇది రాజుల కాలంనాటి వాస్తవ కథాంశం కావడంతో బాలయ్య పూర్తిగా తన మేకోవర్‌పై దృష్టి పెట్టాడని, నడక, నడత, డైలాగ్‌ డెలివరీ వంటి వాటిని తనకు తగ్గ విధంగా మార్చుకోవడానికి కష్టపడుతున్నట్లు సమాచారం. ఇక ఈ చిత్రంలో ఆయనకు గుర్రపుస్వారీ చేయాల్సిన అవసరం ఉందని తెలుస్తోంది. గతంలో కొన్ని చిత్రాలలో బాలయ్యకు గుర్రపుస్వారీ చేసిన అనుభవం ఉన్నప్పటికీ ఈ చిత్రంలో ఆయన పూర్తిస్థాయిలో గుర్రపుస్వారీ చేయాల్సివుండడంతో ఇప్పుడు గుర్రపుస్వారీ విషయంలో ఆయన ప్రత్యేక శిక్షణ తీసుకోవడానికి సిద్దమవుతున్నాడని సమాచారం. ఏదో డూప్‌లతో పని చేయించే విషయంలో పూర్తి వ్యతిరేకి అయిన బాలయ్య ఎంత కష్టమైనా సరే పూరి పర్‌ఫెక్షన్‌ కోసం ఈ నిర్ణయం తీసుకోవడం నిజంగా డేరింగ్‌ నిర్ణయంగా చెప్పుకోవాలి. ఏవో గ్రాఫిక్స్‌ మాయాజాలం కాకుండా తానే ఆయా సీన్లలో నటించడానికి ఈ వయసులో కూడా ఆయన ఇంత కష్టపడటం చాలా గొప్పవిషయమని ఫిల్మ్‌నగర్‌ వర్గాలతోపాటు నందమూరి అభిమానులు కూడా ఎంతో సంతోషంగా ఉన్నారు. కాగా ఈచిత్రానికి 'యోధుడు' అనే టైటిల్‌ను పరిశీలిస్తున్న సంగతి తెలిసిందే.