దేవరకొండ డాడీ నిర్మిస్తేనే నటుడిగా ఎంట్రీ

టాలీవుడ్‌లో బడ్జెట్ మేనేజ్‌మెంట్- ప్రొడక్షన్ ప్రెజర్స్ ఎంత కఠినంగా ఉంటాయో ప్రొడ్యూసర్లకే బాగా తెలుసు. అందుకే ఒక హీరోకి నిర్మాత కష్టం పూర్తిగా అర్థం కావాలంటే వారి తండ్రులే నిర్మాతగా మారి సినిమాలు తీయాలని యంగ్ ప్రొడ్యూసర్ సూర్యదేవర నాగవంశీ తనదైన శైలిలో సరదా కామెంట్స్ చేశారు. తాను హీరోగా ఎప్పుడు నటిస్తానని యాంకర్లు, అభిమానులు ప్రశ్నించగా... విజయ్ - ఆనంద్ దేవరకొండల తండ్రి గోవర్ధన్ రావు గారు సినిమా నిర్మిస్తానంటేనే తాను నటుడిగా కెమెరా ముందుకు వస్తానని నాగవంశీ పంచ్ వేశారు. ఒక వైపు ఆనంద్ దేవరకొండ `ఎపిక్` సినిమాను ఓవర్సీస్‌తో సహా అన్ని చోట్లా సాఫీగా రిలీజ్ చేసేందుకు నిరంతరం శ్రమిస్తూనే.. వేదికపై నాగవంశీ విసిరిన ఈ పంచ్ సోషల్ మీడియాలో తెగ వైరల్ అవుతోంది.

ఈ సరదా వ్యాఖ్యల వెనుక చిన్నపాటి లాజిక్ కూడా ఉందని సినీ విశ్లేషకులు భావిస్తున్నారు. దేవరకొండ సోదరుల తండ్రి గోవర్ధన్ రావు గతంలో టెలివిజన్ సీరియల్స్, అడ్వర్టైజ్‌మెంట్స్ డైరెక్ట్ చేసిన అనుభవం ఉన్న వ్యక్తి. మహబూబ్‌నగర్‌లోని తుమ్మన్‌పేట గ్రామం నుండి నగరానికి వచ్చి.. ఇండస్ట్రీలో నిలదొక్కుకోవడమే కాకుండా... తన ఇద్దరు కుమారులను స్టార్స్‌గా తీర్చిదిద్దడంలోనూ.. వారి బ్యానర్ నిర్మాణాల్లోనూ క్రియాశీలక పాత్ర పోషిస్తున్నారు. అటు డైరెక్షన్ అనుభవం, ఇటు మేనేజ్‌మెంట్ స్కిల్స్ ఉన్న ఆయన సినిమా తీస్తే ప్రొడక్షన్ వాల్యూస్ పక్కాగా ఉంటాయ‌న‌డంలో సందేహం లేదు. ఏది ఏమైనా నిర్మాణ బాధ్యతల హడావుడిలోనూ నాగవంశీ పేల్చిన ఈ పంచ్ ప్రేక్షకులకు భలే వినోదాన్ని పంచింది.