కృష్ణంరాజుకి అలా కలిసొస్తోంది
కలిసొచ్చే కాలానికి నడిసొచ్చే కొడుకు పుడతాడు అన్నట్టు కలిసొచ్చే కాలానికి అదే కొడుకు వల్ల నడిచొచ్చే పదవి లభించే అవకాశం ఉంది కృష్ణంరాజుకి. బాహుబలి విజయం నేపథ్యంలో కృష్ణంరాజు కుటుంబం మొత్తం ఢిల్లీ పర్యటించి బడా నాయకుల ఆశీసులు తీసుకుంటోంది. భారతీయ జనత పార్టీ ఎలాగో కృష్ణంరాజుకి పాతే కాబట్టి మరోసారి తన టెలిఫోన్ బుక్ రిఫ్రెష్ కొట్టి అందరి ఫోన్ నంబర్లు సేకరించి ఇదిగో ఇలా ఢిల్లీలో వాలిపోయాడు.
బాహుబలి విజయం అన్నది ఇక్కడ చిన్న కారణంగా మాత్రమే కనిపిస్తోంది. అసలు గుట్టంతా రాజుగారు మళ్ళీ భాజపాలో చేరడానికే అన్నట్టుగా సాగుతోంది వీరి ప్రయాణం. మోడీ, రాజనాథ సింగ్ లాంటి మహా మహులందరినీ మీట్ అవడం వెనుక అసలు రహస్యం రాజుగారు ఏదో ఒక నామినేటెడ్ పోస్టు కొట్టేయాలన్నదేనట. ఏ పార్టీలోను పట్టుమని పది కాలాలు ఉండని నిలకడలేమితనంతో ఇప్పటి వరకు రాజకీయంగా ఏమీ సాధించలేకపోయిన కృష్ణంరాజు ఈసారైనా బాహుబలి వంకతో భాజపాలో స్థిరమైన స్థానం సంపాదిస్తే పదవులు అవే నడిచి రావంటారా?
