స్టార్ హీరోపై గ్యాంగ్ స్టర్ కాల్పులు
Tiger Shroff shot at in Mumbai
ముంబైలోని జుహు పరిధిలో ఆదివారం సాయంత్రం బాలీవుడ్ నటుడు టైగర్ ష్రాఫ్‌ను లక్ష్యంగా చేసుకుని కొందరు గుర్తుతెలియని వ్యక్తులు జరిపిన కాల్పులు తీవ్ర కలకలాన్ని రేపాయి. ఒక స్థానిక మైదానం నుంచి తన వాహనంలో బయలుదేరుతున్న సమయంలో దుండగులు మూడు నుండి నాలుగు రౌండ్లు కాల్పులు జరిపారు. ఈ ప్రమాదం నుండి టైగర్ ష్రాఫ్ ఎలాంటి గాయాలు కాకుండా క్షేమంగా బయటపడగా.. ఆయన డ్రైవర్ చేతికి గాయమవడంతో చికిత్స నిమిత్తం నానావతి ఆసుపత్రికి తరలించారు.
మహారాష్ట్ర ముఖ్యమంత్రి దేవేంద్ర ఫడ్నవీస్ వెంటనే ముంబై పోలీసు కమిషనర్‌తో మాట్లాడి ఘటనపై వేగవంతమైన విచారణ జరిపించాలని ఆదేశించగా, పోలీసులు సీసీటీవీ ఫుటేజ్ ఆధారంగా నిందితుల కోసం విస్తృత గాలింపు చర్యలు చేపట్టారు.
ఈ కాల్పుల ఘటనతో మహారాష్ట్ర రాజకీయ వాతావరణం ఒక్కసారిగా వేడెక్కింది. ముంబై లాంటి ప్రధాన నగరంలో ఫేమ‌స్ సెలబ్రిటీలకే రక్షణ లేకపోవడంపై ప్రతిపక్ష నేతలు అధికార ప్రభుత్వంపై తీవ్రస్థాయిలో విరుచుకుపడ్డారు. రాష్ట్రంలో శాంతిభద్రతల వ్యవస్థ పూర్తిగా క్షీణించిందని, గ్యాంగ్‌స్టర్ల నెట్‌వర్క్‌ను అదుపు చేయడంలో ప్రభుత్వం విఫలమైందని ప్రతిపక్షాలు విమర్శలు గుప్పించాయి.
ఈ క్రమంలో ఈ దాడి వెనుక లారెన్స్ బిష్ణోయ్ గ్యాంగ్ ప్రమేయం ఉన్నట్లు అధికారిక ప్ర‌క‌ట‌న రావ‌డంతో.. దీనిపైనా ద‌ర్యాప్తు బృందాలు ఆరాలు తీస్తున్నాయి. ప్రభుత్వంపై వస్తున్న రాజకీయ ఒత్తిడి దృష్ట్యా ముంబై పోలీసులు - క్రైమ్ బ్రాంచ్ బృందాలు ఈ కేసును అత్యంత ప్రతిష్టాత్మకంగా తీసుకుని దర్యాప్తును ముమ్మరం చేశాయి.
