ర‌విబాబుతో ఫైర్ బ్రాండ్ తో ఏం చేయ‌బోతుంది?
Ravi Babu Scary Picture With Kanganaటాలీవుడ్‌లో విభిన్నమైన థ్రిల్లర్.. హారర్ సినిమాలకు కేరాఫ్ అడ్రస్‌గా నిలిచిన దర్శకుడు రవిబాబు ఇప్పుడు ఏకంగా బాలీవుడ్ ఫైర్ బ్రాండ్ కంగనా రనౌత్‌తో ఓ క్రేజీ ప్రాజెక్ట్ లాక్ అయిన‌ట్లు వార్త‌లొస్తున్నాయి. `అనసూయ`, `అవును` వంటి చిత్రాలతో ప్రేక్షకులను భయపెట్టిన రవిబాబు ఈసారి తన మార్క్ ఎక్స్‌పెరిమెంటల్ హారర్ కథతో కంగనాను డైరెక్ట్ చేస్తున్నార‌నే వార్త ఇండస్ట్రీలో ఆసక్తిని రేకెత్తిస్తోంది. సురేష్ ప్రొడక్షన్స్ - ఫ్లయింగ్ ఫ్రాగ్స్ బ్యానర్లు నిర్మిస్తున్నాయట.
`స్కేరీ పిక్చర్` అనే ఆసక్తికరమైన టైటిల్‌తో సినిమా తెర‌కెక్కుతుంద‌ని స‌మాచారం. గతంలో `రాజ్: ది మిస్టరీ కంటిన్యూస్`, `చంద్రముఖి 2` వంటి చిత్రాల్లో నటించిన కంగనాకు హారర్ జోనర్ కొత్త కాక‌పోయినా? రవిబాబు మేకింగ్ స్టైల్‌లో ఆమె పాత్ర పవర్‌ఫుల్‌గా ఉండబోతున్నట్లు తెలుస్తోంది.
గతంలో ప్రభాస్ హీరోగా నటించిన `ఏక్ నిరంజన్` తర్వాత దాదాపు 17 ఏళ్ల సుదీర్ఘ విరామం అనంతరం కంగనా మళ్లీ తెలుగు దర్శకుడితో పనిచేస్తుండటం విశేషం. భారతీయ హారర్ సినిమాల్లో ఓ కొత్త ఒరవడిని సృష్టించాలనే రానా దగ్గుబాటి విజన్‌లో భాగంగా ఈ సినిమా తెరకెక్కుతోందంటున్నారు. మ‌రి ఈ ప్ర‌చారం వెనుక నిజా నిజాలు తేలాల్సి ఉంది.
