‘మెగా హీరోలను వదల..’ అంటున్న అనసూయ!

టాలీవుడ్ హాట్ యాంకర్ అనసూయ అటు వ్యాఖ్యతగా.. ఇటు సినిమాల్లోను మంచి మంచి పాత్రలతో నటిస్తూ మెప్పిస్తోంది. మరీ ముఖ్యంగా మెగా హీరోల సినిమాల అవకాశమొస్తే చాలు.. ఈ అమ్మడికి ఇక ఎక్కడలేని ఆనందం వచ్చేస్తుంది. ఇప్పటికే ‘రంగస్థలం’, ‘ఎఫ్-2’తో పాటు పలు చిత్రాల్లో నటించిన ఈ భామ పాత్రకు తగిన న్యాయం చేసి అందరి ప్రశంసలు అందుకుంది. మెగా హీరోలయితే చాలు ఎలాంటి పాత్ర అయినా గ్రీన్ సిగ్నల్ ఇచ్చేస్తోంది ఈ భామ.

ఇన్ని రోజులు జూనియర్ మెగా హీరోలతో నటించిన ఈ హాట్ యాంకర్ ఈసారి ఏకంగా మెగాస్టార్ చిరంజీవి సినిమాలో చాన్స్ కొట్టేసిందట. ప్రస్తుతం ఇందుకు సంబంధించిన పుకార్లు టాలీవుడ్‌లో పెద్ద ఎత్తున వస్తున్నాయి. కొర‌టాల శివ-చిరు కాంబోలో ఆగస్టు-22న మూవీ షూటింగ్ ప్రారంభించనున్నట్లు తెలుస్తోంది. అయితే ఈ సినిమాలో అన‌సూయ ఓ కీల‌క పాత్రలో న‌టించ‌నుంద‌ట. ప‌ట్టుబ‌ట్టి మ‌రి ప్రత్యేకంగా అన‌సూయ కోస‌మే కొర‌టాల ఈ పాత్ర సిద్ధం చేసినట్లు సమాచారం.

సో.. ఇదే నిజమైతే టాలీవుడ్‌లో ఇప్పటికే అక్కినేని నాగార్జున, విక్టరీ వెంక‌టేష్ సరసన నటించగా.. చిరంజీవితో కూడా స్క్రీన్ షేర్ చేసుకోబోతుంద‌న్న మాట. అంతేకాదండోయ్.. సుకుమార్-అల్లు అర్జున్ కాంబినేష‌న్‌లో త్వరలో సినిమా రానుంది. ఈ చిత్రంలో కూడా అన‌సూయకు కీల‌క పాత్ర ఉంటుందని సమాచారం. ఈ రెండు వార్తలు నిజమైతే మాత్రం అనసూయ ఆనందానికి అవధులుండవేమో. మొత్తానికి చూస్తే ‘మెగా హీరోలను వదల’ .. వదిలే ప్రసక్తే లేదని ఈ బ్యూటీ ఫిక్స్ అయిపోయినట్లుంది. ఈ పుకార్లు నిజమవుతాయో లేకుంటే.. పుకార్లుగానే మిగిలిపోతాయో వేచి చూడాల్సిందే మరి.