‘రుద్రమదేవి’ ఎప్పుడు?

వేసవి ఇప్పటికే మూడొంతులు పూర్తయింది. ఇక మిగిలింది చాలా తక్కువరోజులే. అయితే గుణశేఖర్‌ తన స్వీయనిర్మాణ దర్శకత్వంలో రూపొందిస్తున్న ‘రుద్రమదేవి’ ఎప్పుడు విడుదలవుతుందో ఎలాంటి సమాచారం లేదు. దీంతో ఆ చిత్రాన్ని కొన్న బయ్యర్లు, ఆ సినిమా కోసం ఎదురుచూస్తున్న ప్రేక్షకులు బాగా విసిగిపోయారు. ఆడియో అంటూ రెండు చోట్ల హడావుడి చేసిన గుణశేఖర్‌ మాత్రం ఇప్పటివరకు తన చిత్రంపై పెదవి విప్పడంలేదు. దీన్నిబట్టి సినీవర్గాలు ఈ చిత్రం ఇక వేసవికి రావడం కష్టమేనని, జూన్‌ లోపల ఈ చిత్రం విడుదలయ్యే అవకాశం లేదని తేల్చేస్తున్నారు. ముద్దొచ్చినప్పుడే చంకనెక్కాలి.. అనే సామెత ప్రకారం క్రేజ్‌ ఉన్నప్పుడే సినిమాను విడుదల చేసి క్యాష్‌ చేసుకోవాలనే ప్రాధమికసూత్రాన్ని గుణశేఖర్‌ పాటించకపోవడం ఆయనకు చాలా కష్టనష్టాలను తెస్తుందని విశ్లేషకులు అభిప్రాయపడుతున్నారు.