'సీతమ్మ వాకిట్లో సిరిమల్లె చెట్టు' వంటి సూపర్‌హిట్‌ చిత్రం తర్వాత ఆ దర్శకుడు శ్రీకాంత్‌ అడ్డాలపై మహేష్‌ ఎంతో నమ్మకం పెట్టుకున్నాడు. దాంతో 'బ్రహ్మోత్సవం' చిత్రం ఒప్పుకున్నాడు. దీంతో ఈ చిత్రానికి విడుదలకు ముందు ఎంతగానో క్రేజ్‌ వచ్చింది. అందునా ఈ చిత్రాన్ని పివిపి వంటి ప్రతిష్టాత్మక బేనర్‌ ఎక్కడా రాజీపడకుండా నిర్మిస్తుండటంతో ఈ అంచనాలు మరింత పెరిగాయి. కాగా ఈ చిత్రం డిజాస్టర్‌ అయింది. దాంతో పలువురు, మరీ ముఖ్యంగా మహేష్‌ ఫ్యాన్స్‌ దర్శకుడు శ్రీకాంత్‌ అడ్డాలపై విమర్శల వర్షం కురిపించారు. కానీ మహేష్‌ ఈ ప్రచారాన్ని అప్పుడే ఖండించాడు. ఈ విషయంలో శ్రీకాంత్‌ను తప్పుపట్టాల్సిన పనిలేదని, తానే ఆయనకు పిలిచి ఈ అవకాశం ఇచ్చానని, ఈ చిత్ర పరాజయంలో తన పాత్ర కూడా ఎక్కువేనని ఒప్పుకున్నాడు.
స్వతహాగా మహేష్‌ తండ్రి సూపర్‌స్టార్‌ కృష్ణ కూడా తాను హీరోగా పీక్‌ స్టేజీలో ఉన్నప్పుడు ఏ చిత్రమైనా ఫ్లాప్‌ అయితే అందులో తన పాత్ర కూడా ఉందని ఎంతో ధైర్యంగా ఒప్పుకునేవాడు. ఆయా నిర్మాతలకు ఆ తర్వాత మరో చిత్రం చేసిపెట్టేవాడు. అవే లక్షణాలను మహేష్‌ పుణికిపుచ్చుకున్నాడని 'బ్రహ్మోత్సవం' సమయంలో మహేష్‌ను పలువురు మెచ్చుకున్నారు. అంతేకాదు ఆ తర్వాత పివిపికి మరో చిత్రం కూడా చేస్తానని హామీ ఇచ్చాడు. ఈ విషయాన్ని స్వయంగా పివిపినే ప్రకటించాడు. మహేష్‌తో తమకు రెండు చిత్రాలకు అగ్రిమెంట్‌ ఉన్నదని, కాబట్టి రెండో చిత్రంగా వంశీపైడిపల్లి దర్శకత్వంలో తాము మహేష్‌ హీరోగా మరో చిత్రం చేయనున్నామని ప్రకటించారు. మహేష్‌ బర్త్‌డే సందర్భంగా ఈ చిత్రం పోస్టర్‌ను కూడా రిలీజ్‌ చేశారు. కానీ ఈ విషయంలో ఇప్పటివరకు మహేష్‌ అఫిషియల్‌గా స్పందించలేదు.
కాగా గతకొద్దిరోజుల కిందట వంశీపైడిపల్లి-మహేష్‌ల చిత్రానికి పివిపిని తప్పించారని, ఆ స్థానంలో ఈ చిత్రాన్ని దిల్‌రాజు నిర్మించనున్నాడని వార్తలు వచ్చాయి. తాజాగా మరోసారి ఈ చిత్రంపై అలాంటి వార్తలే ప్రచారంలోకి వచ్చాయి. ప్రస్తుతానికి తానున్న బిజీలో పివిపికి మరో చిత్రం చేస్తానని, కానీ దానికి మరింత సమయం ఉందని మహేష్‌ అంటున్నాడంటున్నారు. ఈ చిత్రం విషయంలో మరో తాజా వార్త ఏమిటంటే.. దీనికి దిల్‌రాజుతో పాటు అశ్వనీదత్‌ కూడా భాగస్వామిగా వ్యవహరించనున్నాడని సమాచారం. 'సైనికుడు' డిజాస్టర్‌ తర్వాత అశ్వనీదత్‌కి మరో చిత్రం చేస్తానని మహేష్‌ హామీ ఇచ్చాడని, అందులో భాగంగానే ఈ చిత్రంలో అశ్వనీదత్‌ను భాగస్వామిని చేసుకున్నాడని విశ్వసనీయ సమాచారం. మరి 'సైనికుడు' తర్వాత ఇంత కాలానికి అశ్వనీదత్‌కు ఇచ్చిన మాటను నిలుపుకుంటున్న మహేష్‌, మరి 'బ్రహ్మోత్సవం' ద్వారా భారీగా నష్టపోయిన పివిపికి మరో చిత్రం ఎంతకాలానికి చేస్తాడో? అంటూ సెటైర్లు వినిపిస్తున్నాయి.