స్మగ్లర్‌ వీరప్పన్‌కి సంబంధించిన కథాంశంతో రామ్‌గోపాల్‌వర్మ రూపొందించిన కిల్లింగ్‌ వీరప్పన్‌ చిత్రం నవంబర్‌ 6న ప్రపంచ వ్యాప్తంగా విడుదలవుతోంది. తెలుగు, తమళ్‌, కన్నడ, హిందీ భాషల్లో విడుదలవుతున్న ఈ చిత్రాన్ని బి.వి.మంజునాథ్‌ నిర్మించారు. ఈ చిత్రానికి సంబంధించిన లేటెస్ట్‌ ట్రైలర్‌ని ఆదివారం విడుదల చేశారు. రామ్‌గోపాల్‌వర్మ మళ్ళీ తన ఒరిజినల్‌ స్టాండర్డ్స్‌లో సినిమాలు చేసేందుకు రెడీ అవుతున్నాడా అనిపించేలా ఈ ట్రైలర్‌ వుంది. కంప్లీట్‌ ఫారెస్ట్‌ బ్యాక్‌డ్రాప్‌ని చూపిస్తూ రెడీ చేసిన ఈ ట్రైలర్‌లో చాలా థ్రిల్లింగ్‌ ఎలిమెంట్స్‌ వున్నాయి. టేకింగ్‌, సౌండ్‌ ఎఫెక్ట్స్‌తోనే తన సినిమాలను హిట్‌ చేసిన వర్మ మరోసారి ఆ మ్యాజిక్‌ని ఈ చిత్రంలో రిపీట్‌ చేస్తున్నాడు.
వీరప్పన్‌కి సంబంధించిన కథ అనగానే అతని పుట్టు పూర్వోత్తరాల నుంచి ఎత్తుకోకుండా కేవలం అతని ఎండింగ్‌ డేస్‌కి సంబంధించిన కథాంశాన్ని మాత్రమే వర్మ తీసుకున్నాడు. వీరప్పన్‌ను చంపేందుకు ప్రభుత్వం చేపట్టిన కొకూన్‌ ఆపరేషన్‌ని నేపథ్యంగా తీసుకొని ఈ కథను రాసుకున్నాడు వర్మ. దానికి అతని మార్క్‌ స్క్రీన్‌ప్లే జోడించి ఈ చిత్రాన్ని తీశాడు. కన్నడ హీరో శివరాజ్‌కుమార్‌ ఈ చిత్రంలో ఓ కీలక పాత్ర పోషించాడు.