శేఖర్ కమ్ముల కొత్త సినిమా మొదలైంది

‘ఫిదా’ లాంటి బ్లాక్ బస్టర్ తర్వాత స్టార్ డైరెక్టర్ శేఖర్ క‌మ్ముల చేయ‌బోయే కొత్త సినిమా మొదలైంది. గ‌తంలో త‌న సినిమాల ద్వారా ఎంతో మంది హీరోహీరోయిన్లను ప‌రిచ‌యం చేసిన శేఖ‌ర్ క‌మ్ముల.. ఈ సినిమాలో కూడా అంతా కొత్తవాళ్లకే అవకాశం ఇవ్వనున్నారు. రొమాంటిక్ మ్యూజికల్ లవ్ స్టోరీ‌గా తెర‌కెక్కనున్న ఈ మూవీకి సంబంధించిన స్క్రిప్టు, క్లాప్ బోర్డ్ పూజా కార్యక్రమాలు సోమవారం సికింద్రాబాద్ లోని గ‌ణేష్ ఆల‌యంలో జ‌రిగాయి. ఈ కార్యక్రమంలో దర్శకుడు శేఖర్ కమ్ములతో పాటు నిర్మాతలు సునీల్ నారంగ్, పి.రామ్మోహన్, కో ప్రొడ్యూసర్ విజయ్ భాస్కర్, భరత్ నారంగ్, సదానంద్ పాల్గొన్నారు.

 ప్రీ ప్రొడ‌క్షన్ వ‌ర్క్ అంతా పూర్తి చేసుకున్న ఈ మూవీ రెగ్యులర్ షూటింగ్ డిసెంబ‌ర్‌లో మొదలు కానుంది. ఈ సినిమా ద్వారా ప్రముఖ డిస్ట్రిబ్యూషన్ సంస్థ ‘‘ఏషియ‌న్ గ్రూప్’’ నిర్మాణరంగంలో అడుగుపెడుతోంది. నటీనటులు, మిగతా సాంకేతిక నిపుణుల వివరాలు త్వరలో తెలియజేస్తారు. అమిగోస్ క్రియేషన్స్ స‌మ‌ర్పణ‌లో తెరకెక్కబోయే ఈ ప్రేమక‌థ‌కు నిర్మాత‌లు నారాయ‌ణ దాస్ నారంగ్, పి. రామ్మోహ‌న్. కో ప్రొడ్యూస‌ర్-విజ‌య్ భాస్కర్‌, రచన, దర్శకత్వం: శేఖర్ కమ్ముల.